AITOR FURUNDARENA

Akordeoilari . Musikagile . Irakasle

Euskal Herrian, Parisen eta Kopenhagen ikasia. Bi musika-ardatz ditu: musika garaikidea eta herri musika. Interpretazioan, nazioarteko hainbat akordeoi lehiaketatan saritua, orkestrekin, ganbera musikan, bakarka eta talde ugarirekin aritu izan da eta grabaketa ugari argitaratu du. Sorkuntzan, musika garaikidea eta herri musikaz gain, telebista, antzerki eta zineman aritu da. Kamara Musika, Transkripzio, Errepentizazio eta Herri Musikako Akordeoiko irakasle da Euskal Autonomia Erkidegoko goi-mailako musika ikastegian (MUSIKENE).

Akordeoilari

 

 

Akordeoia, gorputzaren atal sentitzen dut. Hartzen dudanean, nire hezur, gihar, zain, birika eta nerbio sistemak berarekin bat egiten dute. Beste inola sentiarazi ezin ditudanak adierazten ditut. Horretarako erreminta nagusia, akordeoi mota guztiek berdina duten elementu bakarra: HAUSPOA. Edozein musika mota dela ere jotzen dena, hauspoak ematen dio, batez ere, bizia akordeoiari.

 

Akordeoia tresna zoragarria da. Diotenez, metalezko xafla batzuek sortzen omen dute bere soinua, baina hori ez da egia osoa. Xafla horiek hauspoa behar dute, hauspoari nik eragiten diot, eta nire beso/eskuak eta ateratzen den soinuaren tartean, nonbaitetik, ezagutu ditudan beste akordeoilari eta musikariengandik iritsi zaidan altxorra azaltzen da, eta guztion artean musika sortzen dugu.

Musikagile

 

 

Sortzea, zein ederra den. Berez aita banaiz, musika konposatzeak ama ere egiten nau. Agian horregatik ditut bi izen konposatzeko, bat jaiotzez dudana, gurasoek jarritakoa, eta bestea nik asmatua: Johanne Altzürükü.

 

Ez dakit nire obrak eta piezak benetan zenbat diren nire, ez baita jabego kontua. Etengabeko sortzaile gara denok, batzuen sormena barrenean geratzen da, beste batzuok badugu sortutakoa munduratzeko aukera, eta zehazki musikak, hiru munduratze izaten ditu: lehena partitura idaztean, bigarrena interpreteak bere egitean, eta hirugarrena entzuleengana iristean.

 

Barrukoetan barrukoen zait sortzea, sortzen dudan hori ni naizenaren gertukoena da.

DISKOGRAFIA